Vortónfundum streymt

 Í samráði við skólayfirvöld í Garðabæ hefur verið tekin ákvörðun um að vortónfundum tónlistarskólans sem fara fram dagana 14. – 25. maí nk. verði streymt.

Þær sóttvarnarreglur um skólastarf sem nú eru í gildi eru með takmörkunum s.s.  skilyrði um sótthreinsun á milli hópa og  fjölda einstaklinga í sama rými. 

Vegna stærðar skólans þá gera þessi skilyrði okkur ókleift að  skipuleggja alla tónfundi  með áheyrendum og um leið framfylgja gildandi reglum.

Um streymið

Tónfundum verður streymt á lokaðri youtuberás, vinsamlega athugið að ekki er um beint streymi að ræða. Upptaka verður gerð á tónfundinum og henni síðan streymt. Tónlistarskólinn sendir slóð til nemenda og foreldra/forráðamanna þannig að þeir geti horft á streymi af tónfundinum  sem verður tiltækt í nokkra daga eftir að hann fer fram og svo eytt í samræmi við lög nr. 90/2018 um persónuvernd og vinnslu persónuupplýsinga.

Ef foreldrar/forráðamenn óska ekki eftir að barnið þeirra taki þátt í streymi eða upptöku þá biðjum við ykkur að senda tölvupóst á netfangið laufeyo@tongar.is  með nafni nemandans og kennara eigi síðar en miðvikudaginn 12 maí nk.